Þá er búið að skipuleggja sumarið

Sjúkk... ég var búin að hafa smá áhyggjur af þessu !

Barnið er sum sé í 10 vikna sumarfríi eins og gengur og gerist og mér fannst ekki spennandi tilhugsun að senda hana á ÍTR námskeið viku eftir viku (án þess að vilja setja út á þau ágætu námskeið), þar sem hún er jú nýbyrjuð í nýjum skóla og ekki búin að mynda náin tengsl við krakkana þar.

En planið er þannig að skólinn er búinn ca. 7. júní og þann 11. júní kemur Guðný ásamt Önnu Katrinu vinkonu sinni og þær verða hér í tvær vikur að passa Birtu og skemmta sér. Birta fer svo með þeim út þann 25. júní og verður í góðu yfirlæti í Kliplev þar til við förum saman heim 28. júlí. Ég ætla reyndar út 15. júlí og stefnan er sett á Legoland þannig að þetta verður brjálað stuð !

Þegar við förum heim fer skvísan svo í tveggja vikna frí með pabba sínum og þá er bara rúm vika eftir þar til skólinn byrjar sem við dúllum okkur eitthvað tvær !

Eins og sjá má er útlit fyrir skemmtilegt sumar :-D

Annars er allt fínt að frétta af okkur, Birta er auðvitað afar dugleg í skólanum, labbar sjálf á morgnanna og hefur fengið að ganga ein heim nokkrum sinnum líka. Á morgnanna er sum sé gangbrautarvörður en ekki seinni partinn, þess vegna er móðirin móðursjúka frekar mikið með í maganum að vita af pínulitla krílinu sínu einu á ferð yfir Hamrahlíðina ! En það hefur gengið eins og í sögu og ég er ekki frá því að barnið hafi hækkað um nokkra sentimetra í fyrsta sinn sem hún fékk að ganga ein heim ;-)

Um síðustu helgi var Hvítasunna, eins og allir vita, og þá skelltum við okkur í frænkuferð til Ísafjarðar. Þ.e. ég, Systa og Linda, ásamt börnum og Kristjáni Lindumanni ! Við héldum til hjá Þóru og höfðum það í alla staði súpergott í Vestfjarðablíðu. Heimsóttum ömmu og Grétu, fórum í sveitaheimsókn til vinkonu Lindu og sáum mikið af sætu ungviði þar. Fórum í partý og þaðan í Krúsina (pöbbinn), sem hafði ekki breyst að neinu leiti síðan við skemmtum okkur þar síðast fyrir ca. 14 árum, það var hvorki búið að mála né skipta út tónlistinni !!! Á loftinu fyrir ofan Bónus var flóamarkaður og þar fann Birta forláta hjólaskauta á 500 kall, nákvæmlega eins og ég átti ! Ég skil ekkert í mér að losa mig við þá, við værum góðar saman á eins hjólaskautum ;-)